Trúnaðarlæknissamningur sveitarfélagsins við HSU

Sveitarstjórn Rangárþings eystra hefur samþykkt að auka enn frekar við trúnaðarlæknissamning sveitarfélagsins við HSU, Hvolsvelli. 

Ánægja hefur ríkt meðal starfsmanna og stjórnenda með samninginn og mun viðbótin felast í því að starfsmönnum sveitarfélagsins verður boðið upp á heilsufarsskoðun. Heilsufarsskoðanirnar hafa forvarnargildi, en í þeim felast ýmsar mælingar auk hvatningar til heilbrigðara lífernis. Samningurinn er liður í heilsueflandi stefnu sveitarstjórnar.

Þess má einnig geta að sveitarfélagið stóð fyrir heilsuviku sl. haust í samvinnu við fyrirtæki og einstaklinga sem bjóða upp á þjónustu á sviði heilsueflingar og er stefnan að það verði árlegur viðburður. Í heilsuviku leggjast allir á eitt um að kynna sína þjónustu sem lítur að heilsu, en auk þess eru á dagskrá ýmis námskeið og fyrirlestrar á þessu sviði svo allir ættu að geta fundið þar eitthvað við sitt hæfi. Heilsuvikan verður í september.