Grænir fingur teygja sig út fyrir eigin garð

Anna Kristín Helgadóttir á Hvolsvelli er ein þeirra sem er annt um að hafa fallegt í kringum sig, og helst ekki bara innan eigin lóðarmarka. Hún hafði í sumar samband við umhverfis- og garðyrkjustjóra sveitarfélagsins og bauðst til að aðstoða við að rækta upp gamalt beð við rólóinn milli Njálsgerðis og Norðurgarðs.

Framtakið fellur vel að áherslunni á fallegt og snyrtilegt nærumhverfi sem var í forgrunni í nýafstöðnu fegrunar- og hreinsunarátaki í þéttbýli Hvolsvallar. Þá voru íbúar jafnt sem fyrirtæki hvattir til að taka til hendinni og huga að nærumhverfinu. Anna Kristín ætlar nú að halda þeirri stemningu áfram og gefa beði, sem búið var til fyrir rúmlega tíu árum, nýtt líf.

Garðyrkja er henni enda hugleikin. Anna Kristín, sem er deildarstjóri við leikskólann Ölduna, hefur búið á Hvolsvelli frá því um 16 ára aldur og býr nú í Króktúni 11 ásamt fjölskyldu sinni.

Heima við eyðir hún talsverðum tíma í að rækta blóm og tré og segir garðvinnuna vera góða leið til að slaka á og hreinsa hugann. Árangurinn hefur ekki farið fram hjá neinum því fjölskyldan hlaut verðlaun fyrir fallegasta garðinn á Kjötsúpuhátíðinni 2026 um liðna helgi.

Það getur þó komið fyrir að Anna Kristín sé einfaldlega búin með verkefnin í eigin garði. Þá hefur hún stundum beint kröftunum annað og hjálpað nágrönnum sínum við garðverkin.

Beðið við rólóinn er Önnu Kristínu vel kunnugt. Það er skammt frá heimili hennar og hún gengur fram hjá því á leið sinni til vinnu. Hún sá því tækifæri til að taka til hendinni og hafði samband við sveitarfélagið til að kanna hvort hún mætti sjá um að rækta það á ný.

Þannig fær beð sem hefur verið hluti af umhverfinu í um áratug vonandi að blómstra að nýju.

Framtak Önnu Kristínar sýnir jafnframt að það þarf ekki alltaf stór verkefni til að gera góðan mun í nærumhverfinu. Stundum duga grænir fingur, smá tími og vilji til að leggja sitt af mörkum fyrir samfélagið.