Aldarafmæli Þórðar Tómassonar, rithöfundar og fyrrverandi safnstjóri

Þórður Tóm­as­son rithöfundur og fyrrverandi safn­vörður Byggðasafnsins í Skógum í Rangárþingi eystra fagnar 100 ára afmæli sínu í dag, þann 28. apríl 2021. Þórður fæddist í Vallnatúni og foreldrar hans voru þau Kristín Magnúsdóttir og Tómas Þórðarson sem voru bændur og voru systkinin fjögur talsins.

Þórður átti veg og vanda að uppbyggingu Skógasafns, eins stærsta byggðasafns á Íslandi, sem hefur notið gríðarlegra vinsælda meðal innlendra sem erlendra gesta í áraraðir og er ekkert lát þar á. Þórður tók persónulega á móti gestum byggðasafnsins með orgelspili, söng og sagnalist í áraraðir.

Þórður hefur einnig verið gríðarlega ötull í útgáfumálum í gegnum árin og skrifað fjölda bóka um þjóðhætti, minja- og safnamál. Nú í tilefni aldarafmælis síns gefur hann út bókina Stóraborg, staður mannlífs og menningar sem á án efa eftir að gleðja margann lesandann.

Þórður er við góða heilsu og hefur frá mörgu að segja og er minni hans hvergi brigðult. Á meðfylgjandi mynd má sjá Lilju Einarsdóttur sveitarstjóra Rangárþings eystra færa Þórði Tómassyni virðingarvott fyrir ómetanlegt framlag hans til menningar í sveitarfélaginu í áratugi. Móttökurnar voru ekki síðri en á safninu í tíð Þórðar þar sem hann hafði frá miklu að segja heima í stofu í blíðunni undir Eyjafjöllum.