13.10.2025

Föstudaginn 24. október ætla nokkrar konur úr Rangárþingi að halda tónleika í tilefni kvennafrídagsins en 50 ár eru síðan fyrsti kvennafrídagurinn var haldinn. Tónleikarnir verða haldnir í Hvolnum og hefjast kl. 20:00. Aðgangseyrir er 3.000 kr.

Sögulegt mikilvægi dagsins

Valið á dagsetningunni, 24. október, á sér sögulegar rætur. Árið 1975 helgaði Allsherjarþing Sameinuðu þjóðanna árið málefnum kvenna og var 24. október valinn fyrir baráttudag íslenskra kvenna, en það er jafnframt alþjóðlegur dagur Sameinuðu þjóðanna.

Þennan dag lögðu um 90% íslenskra kvenna niður störf, jafnt innan heimilis sem utan, til að undirstrika mikilvægi vinnuframlags síns fyrir samfélagið og krefjast jafnra kjara og réttinda á við karla. Talið er að yfir 25.000 konur hafi safnast saman á útifundi í Reykjavík og vöktu aðgerðirnar heimsathygli.

Baráttan heldur áfram

Kvennafrídagurinn hefur verið haldinn alls sjö sinnum síðan. Dagurinn er því ekki aðeins söguleg minning heldur einnig áminning um þá jafnréttisbaráttu sem enn á sér stað. Málefni á borð við launajafnrétti, verðmat á hefðbundnum kvennastörfum og baráttan gegn kynbundnu ofbeldi eru enn á meðal helstu baráttumála hreyfingarinnar.

Íbúar eru hvattir til að koma á tónleikana til að sýna samstöðu og styðja við jafnréttisbaráttuna á Íslandi.


Til baka