Styrkir til atvinnumála kvenna: Opnað fyrir umsóknir í febrúar

Sveitarfélagið Rangárþing eystra hvetur frumkvöðlakonur í héraði til að kynna sér styrki til atvinnumála kvenna, en opnað verður fyrir umsóknir í byrjun febrúar næstkomandi.

Styrkirnir eru veittir einu sinni á ári og eru ætlaðir konum sem vinna að viðskiptahugmyndum eða eru að þróa tiltekin verkefni. Meginmarkmið úthlutunarinnar er að auka aðgengi kvenna að fjármagni og styðja við fjölbreytta nýsköpun.

Á síðustu árum hefur um 40 milljónum króna verið úthlutað árlega í fjölbreytt verkefni um allt land. Reynslan sýnir að þessi stuðningur skiptir verkefnin oft miklu máli, auk þess sem styrkirnir virka sem góð hvatning fyrir þær sem eru að stíga sín fyrstu skref í atvinnurekstri.

Úthlutunin byggir á lögum um jafna stöðu og jafnan rétt kynjanna, en þar eru sértækar aðgerðir sem þessar heimilaðar til að jafna stöðu kynjanna á vinnumarkaði.

Það er félags- og húsnæðisráðherra sem veitir styrkina en Vinnumálastofnun sér um alla umsýslu. Skrifstofa Atvinnumála kvenna er til húsa hjá Vinnumálastofnun að Grensásvegi 9 í Reykjavík.

Íbúar sem reka eða hyggja á rekstur fyrirtækja í Rangárþingi eystra geta nálgast frekari upplýsingar með því að senda póst á netfangið atvinnumalkvenna@atvinnumalkvenna.is.

Við hvetjum konur í okkar samfélagi sem eru með góðar hugmyndir í höndunum til að kynna sér málið vel þegar nær dregur febrúarmánuði.