19.12.2025

Sveitarstjórn Rangárþings eystra samþykkti fjárhagsáætlun fyrir árið 2026 við síðari umræðu á fundi sínum í síðustu viku. Áætlunin ber með sér að rekstur sveitarfélagsins er í góðu jafnvægi og gert er ráð fyrir jákvæðri rekstarniðurstöðu sem nemur 107 milljónum króna í A-hluta.

Við gerð áætlunarinnar var lögð áhersla á að styrkja þjónustu við íbúa og mæta hækkunum á fasteignamati með lækkun álagningarprósenta, auk þess að halda áfram uppbyggingu innviða.

Helstu niðurstöður og breytingar fyrir íbúa:

  • Lækkun fasteignagjalda: Til að mæta 10% meðal hækkun á fasteignamati íbúðarhúsnæðis í Rangárþingi eystra er álagningarprósenta fasteignaskatts lækkuð úr 0,375% í 0,34%. Einnig lækkar álagningarprósenta vatnsskatts og holræsagjalds.
  • Frístundastyrkur innleiddur: Sveitarstjórn hefur ákveðið að taka upp frístundastyrk fyrir börn og ungmenni á aldrinum 6–18 ára. Markmiðið er að jafna tækifæri barna til þátttöku í íþrótta- og tómstundastarfi.
  • Framkvæmdir og viðhald: Áætlunin gerir ráð fyrir fjárfestingum upp á rúmar 780 milljónir króna sem er með því mesta sem áætlað hefur verið. Meðal verkefna má nefna endurnýjun gatna og lagna í Litlagerði, fyrsta áfanga gatnagerðar í Bergþórugerði og lagningu göngu- og hjólastíga víðsvegar í sveitarfélaginu.
  • Íþróttamál: Framundan eru spennandi verkefni á íþróttasvæðinu, þar á meðal framkvæmdir við nýjan gervigrasvöll og endurnýjun á sparkvelli, auk hönnunar á útisvæði sundlaugar.

Traustur rekstur þrátt fyrir áskoranir Tekjur af Jöfnunarsjóði sveitarfélaga munu lækka verulega, eða um 13,4%, vegna lagabreytinga sem taka gildi um áramótin. Þrátt fyrir þetta er fjárhagsstaða sveitarfélagsins sterk. Skuldahlutfallið heldur áfram að lækka milli ára og er áætlað 63,9% sem er vel innan viðmiða, og handbært fé frá rekstri er um 410 milljónir króna. Það gerir sveitarfélaginu kleift að fjármagna stóran hluta framkvæmda með eigin fé.

Úr minnisblaði sveitarstjóra:

“Mikil og góð vinna bæði kjörinna fulltrúa í sveitarstjórn og starfsmanna sveitarfélagsins hefur verið lögð í áætlunina, sem jafnframt er sú síðasta sem núverandi sveitarstjórn leggur fram til samþykktar. Öll þessi mikla vinna skilar sér tvímælalaust í vandaðri áætlanagerð sem er okkur gríðarlega mikilvægt til reksturs sveitarfélagsins til framtíðar. Það er alveg ljóst að rekstur Rangárþings eystra gengur vel og er sveitarfélagið vel í stakk búið til að sinna þjónustu og uppbyggingu innviða á næstu árum. Stöndugur rekstur sveitarfélagsins á að sjálfsögðu að skila sér til íbúa með aukinni þjónustu og lægri álögum.”

 

Hægt er að kynna sér fjárhagsáætlunina og greinargerð með henni í heild sinni hér á heimasíðunni. 


Til baka