05.12.2025
Starfshópur umhverfis-, orku- og loftslagsráðuneytisins hefur skilað skýrslu um fýsileika þess að stofna þjóðgarð í Þórsmörk. Meginniðurstaða hópsins, sem skipaður var í framhaldi af beiðni frá sveitarfélaginu Rangárþingi eystra, er sú að ekki sé tímabært að leggja til stofnun þjóðgarðs að svo komnu máli.
 
Niðurstaðan byggir á góðu samráði við íbúa, rekstraraðila og aðra hagaðila á svæðinu, en lögð var rík áhersla á að sjónarmið heimamanna fengju vægi í ferlinu.
 
Samráð skilaði skýrri sýn Starfshópurinn lagði áherslu á samtal við nærsamfélagið. Alls voru haldnir tíu fundir, þar á meðal opnir íbúafundir og fundir með ferðaþjónustuaðilum, fjallskilanefndum og öðrum hagsmunaaðilum.
Í starfshópnum sátu heimamennirnir Anton Kári Halldórsson, sveitarstjóri Rangárþings eystra, og Rafn Bergsson, sveitarstjórnarfulltrúi, ásamt Drífu Hjartardóttur, fyrrverandi alþingismanni, sem veitti hópnum formennsku.
 
Helstu sjónarmið Á fundunum komu fram margvíslegar ábendingar:
  • Áhyggjur: Íbúar lýstu áhyggjum af aukinni stofnanavæðingu og miðstýringu. Þá voru uppi raddir um að aukin fjöldaferðamennska gæti haft áhrif á þau sérkenni sem einkenna Þórsmörk.
  • Kostir: Jákvætt var litið til möguleika á aukinni fjármögnun til svæðisins og skýrari framtíðarsýn.
  • Niðurstaða: Almenn afstaða fundarmanna var sú að mikilvægt væri að umsjón og stjórnun svæðisins héldist í höndum heimamanna.
Framtíðarsýn og næstu skref Starfshópurinn tók mið af þessum ábendingum og telur ekki rétt að stofna þjóðgarð á þessum tímapunkti. Í skýrslunni kemur fram að staðan í Þórsmörk sé almennt góð og aðilar á svæðinu, svo sem Land og skógur, sveitarfélagið og rekstraraðilar, sinni mikilvægri uppbyggingu og viðhaldi, til dæmis á göngustígum.
 
Vinnan sem lögð var í skýrsluna mun nýtast vel sem veganesti fyrir sveitarfélagið og ríkið við að móta stefnu fyrir svæðið til framtíðar.
Sveitarfélagið Rangárþing eystra þakkar öllum þeim sem tóku þátt í samráðinu fyrir dýrmætt innlegg.
Áframhaldandi samstarf er lykillinn að því að tryggja að Þórsmörk verði áfram sú náttúruperla sem hún er.
 
Skýrslu starfshópsins má lesa hér í heild sinni.

Til baka