Íþróttamaður ársins 2015

Sú hefð hefur skapast á undanförnum árum að útnefna íþróttamann ársins, 17. júní. Fyrirkomulagið á valinu er þannig að félög hér í Rangárþingi eystra tilnefna 1-2 iðkendur frá sínu félagi og auk þess hefur íþrótta og æskulýðsfulltrúi einnig rétt á að tilnefna einstakling. Helstu skilyrði fyrir tilnefningu er að viðkomandi sé 15 ára eða eldri og  hafi stundað íþrótt sína með félagi hér í sveitarfélaginu eða sé hér með lögheimili. Heilsu, íþrótta og æskulýðsnefnd velur  íþróttamann ársins úr þeim hópi sem tilnefndir eru.

Í ár voru  4 einstaklingar tilnefndir en sá sem sigraði var Andri Már Óskarsson

Andri Már Óskarsson, golf. 

Andri Már Óskarsson  er fæddur 1991 og hefur leikið golf með GHR í mörg ár. Andri Már er klúbbmeistari GHR og tók þátt í Eimskipsmótaröðinni þar sem hann tók þátt í öllum mótum sem í boði voru fyrir utan eitt en þá var hann að taka próf í skólanum. Hann var í 5 sæti á Íslandsmótinu í höggleik, gekk vel og spilaði á pari. Auk þess varð hann í 9 sæti á Íslandsmótinu í holukeppni. Hann náði 9. sæti á stigalista GSÍ. Andri Már er einn af bestu kylfingum landsins sem hefur náð mjög góðum árangri í sinni íþrótt. Hann hefur stundað golf frá unga aldri og hefur náð góðum árangri. Hann æfir og spilar mikið, kemur vel fyrir og er yfirvegaður golfari hvort sem er innan eða utan vallar.  Til hamingju Andri Már.

Hinir þrír sem tilnefndir voru:

Hjörvar Sigurðsson, knattspyrna

Hjörvar Sigurðsson er fæddur 1990 og hefur leikið knattspyrnu með KFR frá árinu 2007.

Hann lék með 16 leiki í deild og bika árið 2015 og skorðaði í þeim 4 mörk, hvert öðru glæsilegra.Hjörvar var í fyrra og hefur verið fyrirliði liðsins undanfarin ár og verið með betri miðjumönnum 3. deildar. Hann hefur verið drjúgur að skora mörk í gegnum tíðna og er góð fyrirmynd fyrir yngri iðkendur félagsins.