Brynjólfur Þorsteinsson fær Ljóðstaf Jóns úr Vör

Á hverju ári efnir lista- og menningarráð Kópavogsbæjar til ljóðasamkeppni undir heitinu Ljóðstafur Jóns úr Vör. Í ár var það Brynjólfur Þorsteinsson frá Hvolsvelli sem hlaut Ljóðstafinn fyrir ljóð sitt Gormánuður. Alls bárust 302 ljóð í keppnina og þótti ljóð Brynjólfs "draga fram íslenskan hversdag sem birtist dularfullur og margræður, þar sem samruni náttúru og líkama myndar óljós og áhugaverð mörk milli heima" eins og dómnefndin komst að orði í umsögn sinni. (tekið af síðu rúv.is)

Brynjólfur er fæddur 1990, sonur þeirra hjóna Ástu Brynjólfsdóttur og Þorsteins Jónssonar. Myndina sem fylgir fréttinni tók einmitt Þorsteinn þegar Ljóðstafurinn var afhentur þann 21. janúar sl.

Rangárþing eystra óskar Brynjólfi til hamingju með þennan góða árangur.

Gormánuður

allir hrafnar eru gat
líka þessi sem krunkar
uppi á ljósastaur

eins og brot
í himingrárri tönn

sjóndeildarhringurinn nakin tré
skorpin vör

pírðu augun
einblíndu á fjaðursortann

það glittir í úf

allir hrafnar eru gat
og innvolsið uppdráttur að morgundegi

líka í þessum sem krunkar
uppi á ljósastaur

lestu hann
með vasahníf og opinn munn

hjartað springur
eins og ber undir tönn

bragðið er svart