Fjallahjólakeppni í Rangárþingi

 

Rangárþing Ultra er fjallahjólakeppni sem er samstarfsverkefni Rangárþings eystra og Rangárþings ytra og er haldin annan föstudag í júní, ár hvert.

Keppnin var fyrst haldin árið 2017 og tók hún við af hjólakeppninni Tour de Hvolsvöllur, en þá var hjólað frá Reykjavík á Hvolsvöll. Með aukinni umferð um þjóðvegi landsins taldist sú keppni of hættuleg og ákveðið var að breyta aðeins til.

Þar sem fjallahjólakeppnin Rangárþing Ultra er samstarfsverkefni sveitarfélaganna tveggja er skipst á að hefja keppni á Hellu eða Hvolsvelli. 
Hjóluð er 50 km leið milli sveitarfélaganna og án viðkomu á Þjóðveg 1. Leiðin skiptist þannig að um 14 km eru á malbiki, 22 km á möl og 14 km á slóðum. 

Veitt eru verðlaun í fjórum flokkum, bæði karla og kvenna.

Keppnin stækkar með hverju árinu og margir af fremstu hjólreiðamönnum og -konum láta sig ekki vanta enda skemmtileg leið sem hjóluð er og mikil stemmning ár hvert. 

Heimasíða keppninnar er rangarthingultra.is og þar er hægt að nálgast allar frekari upplýsingar.