Félagsþjónusta


Félagsþjónusta Rangárvalla- og V-Skaftafellssýslu
Austurvegur 4, 2. hæð
860 Hvolsvöllur
Sími: 487-8125
Símatími alla virka daga milli 10:00-12:00


Starfsmenn félagsþjónustunnar
Álfhildur Hallgrímsdóttir félagsmálastjóri
Netfang: rang.vest@simnet.is

Rúnar Halldórsson, félagsmálaráðgjafi
Netfang: fel.rang@simnet.is

 

Þjónusta við íbúa á öllum aldri

Félagsþjónustan er samstarfsverkefni Ásahrepps, Rangárþings ytra, Rangárþings eystra, Mýrdalshrepps og Skaftárhrepps. Íbúar þessara svæða eiga því rétt á þjónustu stofnunarinnar.

Skrifstofa - viðtalstímar
Aðalskrifstofa félagsþjónusunnar er að Austurvegi 4 á Hvolsvelli en hún hefur einnig aðsetur á skrifstofum hreppanna. Íbúar Ásahrepps geta óskað eftir að viðtöl fari fram á Laugalandi. Íbúar í Rangárþingi ytra geta óskað eftir að viðtöl fari fram á skrifstofu hreppsins á Hellu. Mýrdalshreppi er aðstað til viðtala á hreppsskrifstofunni Austurvegi 17 og í Skaftárhreppi er aðstaða til viðtala að Klausturvegi 15. Viðtalspantanir fari fram í síma 487-8125. Starfsmenn fara jafnframt oft á heimili þeirra sem þess óska.

Starfsmenn Félagsþjónustunnar eru bundnir þagnarskyldu um einkamál þeirra er njóta þjónustunnar.

Verkefni félagsþjónustunnar
  • Málefni aldraðra
  • Málefni fatlaðra
  • Fjárhagaðstoð
  • Fræðsla
  • Félagsleg ráðgjöf
  • Forvarnir
  • Barnaverndarmál
  • Félagsleg heimaþjónusta
  • Umsagnir fyrir verðandi sumadvalarforeldra
  • Umgengismál
  • Umsagnir fyrir verðandi fósturforeldra
  • Umsagnir í ættleiðingum
  • Umsagnir fyrir verðandi dagforeldra
  • Félagslegt leiguhúsnæði

Ekki hika!
Á lífsleiðinni geta allir staðið frammi fyrir erfiðleikum af einhverjum toga, smáum sem stórum. Félagsráðgjafar Félagsþjónustunnar veita einstaklingum og fjölskyldum ráðgjöf og byggist þjónustan á að koma til móts við þarfir þeirra sem þangað leita með hjálp til sjálfshjálpar að leiðarljósi. Félagsráðgjafarnir hafa það hlutverk að veita upplýsingar og leiðbeiningar um félagsleg réttindamál annars vegar og stuðning vegna félagslegs og persónulegs vanda hins vegar auk þess að leiðbeina fólki um og vísa í þau úrræði sem henta hverjum og einum. Félagsleg ráðgjöf tekur m.a. til ráðggjafar vegna: atvinnuleysis, veikinda, húsnæðisvanda, fjárhagsvanda, fötlunar, öldrunar, málefni barna og ungmenna, fjölkskylduvanda, málefni útlendinga og áfengis- og vífuefnavanda. Félagsþjónusta er lögbndin og ber sveitarfélögum að veita hana. Ekki hika ef þú telur þig þurfa að nota þjónustuna. Hafðu samband.


Þjónusta við aldraða

Þjónusta við aldraða miðar að því að þeir geti búið í heimahúsi við sem eðlilegast heimilislíf svo lengi sem kostur er. Aldraðir eiga rétt á allri almennri þjónustu sem veitt er á Félagsþjónustunni samkvæmt lögum um félagsþjónustu sveitarfélaga nr. 40/1991 og lögum um málefni aldraða nr. 124/1999. Sérstaklega er vert að vekja athygli á félagslegri heimaþjónustu og möguleikum á heimsendum mat. Heimahjúkrun er hins vegar skipulögð og sinnt af heilsugæslum á svæðinu en oft er náin samvinna um fyrirkomulag og framkvæmd þjónustunnar þannig að þörfum hins aldraða sé sem best mætt.

 

Vilt þú verða að liði?

Til að hægt sé að sinna lögbundinni þjónustu og stuðningi við einstaklinga og fjölskyldur þarf að hafa hæft fólk til að sinna slíkum verkefnum. Ef þú hefur áhuga á að gerast stuðningsaðili t.d. liðveitandi, tilsjónarmaður eða stuðningfjölskylda hikaðu þá ekki vð að hafa samband. Starfsmenn félagsþjónustunnar gera jafnframt úttektir á heimilum er hyggjast taka börn til sumardvalar eða í fóstur. En enginn má lögum samkvæmt taka vandalaus börn til dvalar án leyfis barnaverndarnefndar í heimasveit sinni. Hafið því samband ef þið hyggist taka slíkt verkefni á hendur.

 

Fjárhagsaðstoð
Þær aðstæður geta skapast í lífi hvers og eins að hann tímabundið vegna veikinda, skyndilegra áfalla eða annarra atburða lendi í fjárhagserfiðleikum. Starfsmenn Félagsþjónustunnar eru reiðubúnir að leiðbeina og aðstoða einstaklinga við að leita réttar síns við slíkar aðstæður. Fjárhagsaðstoð frá Félagsþjónustunni fer eftir 21 gr. laga um félagsþjónustu sveitarfélaga nr. 40/1991 og reglum um fjárhagsaðstoð sem hvert sveitarfélaganna hefur sett sér. Í 19. gr. laga um félagsþjónustu sveitarfélaga segir m.a. að hverjum manni er skylt “að framfæra sjálfan sig, maka sinn og börn yngri en 18 ára".Verði einstaklingur að leita eftir aðstoð sveitarfélagsins um þetta þarf hann að vera fjárráða og eiga lögheimili í viðkomandi sveitarfélagi. Upphæð fjárhagsaðstoðar fer eftir tekjum umsækjanda hverju sinni. Aðstoðin er í formi styrks eða láns. Sótt er um fjárhagsaðstoð hjá starfsmönnum félagsþjónustunnar.


Umsókninni þarf að fylgja:

     -  Tekjuseðlar ( laun/bætur) sl. 2 mánuði

     -  Nýjasta skattaframtal.

     -  Skráning hjá vinnumiðlun eða læknisvottorð um óvinnufærni.

     -  Upplýsingar um skuldastöðu t.d. yfirlit greiðsluþjónustu.


Félagsmálanefndir á hverjum stað taka beiðnir til afgreiðslu á fundum sínum. Áfrýja má niðurstöðum félagsmálanefnda til úrskurðarnefndar félagsþjónustu í Félagsmálaráðuneytinu.

Ath. að fjárhagsaðstoð er skattskyld og af henni er dregin staðgreiðsla skatta. Mikilvægt er að skila inn skattkorti áður en til greiðslu kemur. Fjárhagsaðstoð, sem veitt er á grundvelli rangra eða villandi upplýsinga er ávallt endurkræf.

 

Barnaverndarmál

Markmið barnaverndar er að tryggja börnum viðunandi uppeldisskilyrði. Það er gert með því að styrkja uppeldishlutverk fjölskyldunnar og beita úrræðum til verndar einstökum börnum þegar það á við. Með börnum er átt við einstakling undir 18 ára aldri. Þjónustan er í samræmi við barnaverndarlög nr. 80/2002 og önnur lög, eftir því sem við á hverju sinni. Starfsmenn Félagsþjónustunnar eru ávallt til viðtals við foreldra varðandi uppeldisráðgjöf. Börn geta ávallt leitað sjálf til félagsráðgjafa Félagsþjónustunnar vegna aðstæðna sinnar eða líðan. Ein barnaverndarnefnd er fyrir svæðið sem nær frá Þjórsá að Lómagnúp og eru starfsmenn Félagsþjónustunnar jafnframt starfsmenn nefndarinnar og sinna eftirliti með aðbúnaði og aðstæðum barna í umboði nefndarinnar.

 

Barnaverndarlög nr. 80/2002 leggja þær skyldur á almenning að gera barnaverndarnefnd viðvart ef þess verður vart að barni sé misboðið, uppeldi þess vanrækt eða aðbúnaði þess svo áfátt að því geti stafað hætta af. Sérstakar skyldur eru lagðar á lögreglu og þá sem hafa afskipti af börnum, s.s. kennara, dagmæður, presta, lækna, ljósmæður, hjúkrunarfræðinga, sálfræðinga og félagsráðgjafa um að tilkynna slík mál til barnaverndarnefndar. Starfsmenn Félagsþjónustunnar taka við tilkynningum í síma 487 8125.


Almenningur sem tilkynnir um vanrækslu barns eða óviðunandi misfellur á uppeldi þess getur óskað nafnleyndar. Það á þó ekki við gagnvart barnaverndarnefnd og starfsmönnum nefndarinnar.

 

Fatlaðir
Markmið með þjónustu við fatlaða er að skapa þeim forsendur til að lifa sem eðlilegustu lífi. Fatlaðir eiga rétt á almennri þjónustu sem veitt er af Félagsþjónustunni á grundvelli laga um félagsþjónustu sveitarfélaga nr. 40/1991 og laga um málefni fatlaðra nr. 59/1992. Sá sem býr utan stofnunar og er andlega eða líkamlega fatlaður getur sótt um að fá einstakling (liðveitanda) sér til aðstoðar. Markmiðið með liðveislu er að rjúfa einangrun, veita persónubundinn stuðning og efla þannig einstaklinginn. Í sumum tilvikum eiga fatlaðir rétt á akstursþjónustu.

 

 

Félagsleg heimaþjónusta 


Algengar spurningar 

Markmið félagslegrar heimaþjónustu er að efla einstaklinginn til sjálfshjálpar og gera honum kleift að búa á eigin heimili sem lengst við sem eðlilegastar aðstæður. Þrátt fyrir að erfiðleikar steðji að, svo sem vegna veikinda, fötlunar eða fjölskylduaðstæðna.

 

Hvað er félagsleg heimaþjónusta?  Með félagslegri heimaþjónustu er átt við hvers konar aðstoð við heimilishald, persónulega umhirðu, félagslegan stuðning, gæslu og umönnun barna og unglinga.

 

Hverjir eiga rétt á félagslegri heimaþjónustu? Þeir sem búa í heimahúsum og geta ekki séð hjálparlaust um heimilishald og persónulega umhirðu vegna skertrar getu, fjölskylduaðstæðna, álags, veikinda, barnsburðar eða fötlunar.

 

Hvað felst í félagslegri heimaþjónustu? Algengustu þættir félagslegrar heimaþjónustu eru þrif, innlit og í sumum tilvikum heimsending matar og akstur þar sem fólk á langt í þjónustu.

 

Er greitt fyrir þjónustuna? Sveitarfélögin hvert fyrir sig setja sér reglur um kostnað vegna þjónustunnar. Oftast er hann tekjutengdur þannig að þeir sem hafa litlar tekjur greiða lágt eða ekkert gjald fyrir hana.

 

Hvað fæ ég mikla þjónustu? Sjúklingar þurfa að leggja fram læknisvottorð þegar þeir óska eftir þjónustu. Félagsráðgjafar og/ eða starfsmenn félagslegu heimaþjónustunnar hjá hverju sveitarfélagi fara á heimili fólks og hlusta á óskir þess og meta þjónustuþörfina.

 

Hverjir veita þjónustuna? Get ég fengið ættingja mína til þess að veita mér þjónustu? Starfsmenn félagslegu heimaþjónustunnar hjá hverju sveitarfélagi fyrir sig veita þjónustuna. Það er undantekning ef ættingjar eru ráðnir til þess.

 

Hvert sný ég mér ef ég óska eftir félagslegri heimaþjónustu? Starfsmenn Félagsþjónustu Rangárvalla- og Vestur Skaftafellssýslu (487 8125) ásamt starfsmönnum félagslegu heimaþjónustunnar á Hvolsvelli (488 4200) og Hellu (487 5834) taka á móti beiðnum um félagslega heimaþjónustu.